வருட இறுதி நாள் நன்றி வழிபாடு

வருட இறுதி நாள் நன்றி வழிபாடு - 2025

முன்னுரை

கிறிஸ்துவின் பிறப்பில் அகமகிழ்ந்து, புதிய உறவில் புதுமை கண்டு இன்று தொடங்கும் புதிய வருடத்திற்காக இறைவரம் வேண்ட கூடி வந்திருக்கும் இனிய உறவுகளே! இவ் இறுதி நாள் வழிபாட்டுக்காக உங்களை அன்புடன் அழைத்து நிற்கின்றோம்.

2025ம் ஆண்டு எங்களை கடந்துசெல்கின்றது. விடைபெரும் இவ்வாண்டு எமக்கு காட்டிய வாழ்வுப் பாதைக்காக, கற்றுக்கொண்ட உயரிய விழுமியங்களுக்காக நன்றி கூறுவோம். மேலும் சந்தித்த தோல்விகளில், பிரிந்துசென்ற உறவுகளில், உள்ளத்தில் சுமந்த வலிகளில் இறைவனின் தாங்கும் வலிமைக்காகவும், எம்மை அணைத்துச்சென்ற பொழுதுகளுக்காகவும், சுகம்தந்து, திடம்தந்து காத்த நேரங்களுக்காகவும் நன்றி கூறவும் கூடிவந்துள்ளோம்.

நேற்று எம்மோடு இருந்தவர்கள் இன்று எம்முடன் இல்லை. இருப்பினும் நேற்று சுமந்த அனுபவங்கள் இன்று வாழ்வின் பாடமாக மாறிவிட்டன, எம்மை உருவாக்கிவிட்டன. நாம் விரும்பியோ விரும்பாமலோ எம்மை புடமிடும் வாழ்வின் எடுகோல்கள் எம்மை முன் நகர்த்திக்கொண்டே செல்கின்றன. அரசியல் நகர்வுகள் ஒருபுரம், கலாசார சீர்கேடுகள் மறுபுரம், போதைக் கும்பல்களோடு போராடி போராடி பிள்ளைகளையும் அவர்கள் எதிர்காலத்தையும் பாதுகாக்க படும்பாடுதான் என்ன! இயற்கை நுண்னறிவு என்று அறிவியலோடும், விஞ்ஞானத்தோடும் போராடும் புதிய காலம் பிறந்துவிட்டது. இருப்பினும் ஞானம் தொலைந்துவிட்டதா என்பது இன்று விடுக்கப்படும் புதிய கேள்வியே. இன்று ஆடம்பரங்களும், கொண்டாட்டங்களும் எச்சூழ்நிலையிலும், எச்சந்தர்ப்பத்திலும் குறையவே இல்லை. யோவான் நற்செய்தியில் 'ஒளியான அவர் உலகில் இருந்தார். உலகு அவரால்தான் உண்டானது. ஆனால் உலகு அவரை அறிந்து கொள்ளவில்லை. அவர் தமக்குரியவர்களிடம் வந்தார். அவருக்கு உரியவர்கள் அவரை ஏற்றுக்கொள்ளவில்லை. யோவா:1:10-11' எமது பாகுபாடுகள், நாம் உருவாக்கிய பிரிவினைகள் இயேசுவை அறிந்துகொள்ளாமலும், அவரை ஏற்றுக்கொள்ளாமலுமே அவரின் பிறப்பில் மகிழ அழைக்கின்றது. இது முரண்பாடானதே. கேள்விகளை தொடுத்துக்கொண்டு போனால், நம்பிக்கைக்கும் இடமில்லையே!

கிறிஸ்துவை வரவேற்கும் புதிய யுகம் பிறக்கின்றது. இரண்டாயிரம் ஆண்டுகளாக கிறிஸ்து பிறந்துகொண்டு தான் இருக்கின்றார், இருப்பினும் இதயத்தில் அவர் பிறக்கவில்லையெனின் அவர் இன்னும் எம்மில் பிறக்கவே இல்லையே! இன்று எமது வழிபாடு நாம் யார் எம்பதையும், நான் யார் என்பதையும் அறிய, ஆராய அழைக்கின்றது. 2025ம் ஆண்டு எம்மை புடமிட்டிருக்கின்றது.

'எப்பொழுதும், மகிழ்ச்சியாக இருங்கள். இடைவிடாது இறைவனிடம் வேண்டுங்கள். எல்லாச் சூழ்நிலையிலும் நன்றி கூறுங்கள். உங்களுக்காகக் கிறிஸ்து இயேசு வழியாய்க் கடவுள் வெளிப்படுத்திய திருவுளம் இதுவே' 1தெச: 5:16-18. புனித பவுலின் இவ் அழைப்போடு எமது வாழ்வைக் குறித்து நன்றி சொல்லி, நாம் தொடங்கவிருக்கும் புதிய ஆண்டு எமக்கு புதிய ஆசீர்களைத் தரவேண்டும் என்று மன்றாடுவோம்.

பாடல்

உன் சிறகுகள் நிழலில் எந்நாளும் என்னை

அரவணைத்திடு இறைவா

எந்த இருளிலும் ஒளி சுடரும்

வெண்தணலிலும் மனம் குளிரும் (2)

உந்தன் கண்களின் இமைபோல்

எந்நாளும் என்னைக் காத்திடு என் இறைவா (2)

1. பாவங்கள் சுமையாய் இருந்தும் உன்

மன்னிப்பில் பனிபோல் கரையும் (2)

கருணையின் மழையில் நனைந்தால் உன்

ஆலயம் புனிதம் அருளும் (2)

2. வலையினில் விழுகின்ற பறவை

அன்று இழந்தது அழகிய சிறகை (2)

வானதன் அருள் மழை பொழிந்தே

நீ வளர்த்திடு அன்பதன் உறவை (2)

இறைவார்த்தையுடன் ஆண்டவரை புகழ்வோம், ஆராதிப்போம், அவரை மகிமைப் படுத்துவோம்.

உங்கள் பதிலுரையாக: ஆண்டவரே, எங்கள் தலைவரே, உமது பெயர் உலகெங்கும் எவ்வளவு மேன்மையாய் விளங்குகின்றது! (திபா:8:9)

(எசா: 12:4,5) - ஆண்டவருக்கு நன்றி செலுத்துங்கள்; அவர் திருப்பெயரைப் போற்றுங்கள்; மக்களினங்களிடையே அவர்செயல்களை அறிவியுங்கள்; அவர் திருப்பெயர் உயர்க எனப் பறைசாற்றுங்கள். ஆண்டவருக்குப் புகழ்ப்பா அமைத்துப் பாடுங்கள்; ஏனெனில் அவர் மாட்சியுறும் செயல்களைப் புரிந்துள்ளார்; அனைத்துலகும் இதை அறிந்துகொள்வதாக.

உங்கள் பதிலுரையாக: ஆண்டவரே, எங்கள் தலைவரே, உமது பெயர் உலகெங்கும் எவ்வளவு மேன்மையாய் விளங்குகின்றது!

(1கொரி: 1:4-5) - கிறிஸ்து இயேசுவின் வழியாக நீங்கள் பெற்றுக்கொண்ட இறையருளை முன்னிட்டு உங்களை நினைத்து என் கடவுளுக்கு என்றும் நன்றி செலுத்துகிறேன். ஏனெனில், நீங்கள் கிறிஸ்துவுடன் இணைக்கப்பெற்றுச் சொல்வன்மையும் நிறையறிவும் பெற்று, எல்லா வகையிலும் செல்வர்களானீர்கள்.

(பிலி:1:3-7) உங்களை நினைவுகூரும்பொழுதெல்லாம் என் கடவுளுக்கு நன்றி கூறுகிறேன்; உங்கள் அனைவருக்காகவும் எப்பொழுதும் மகிழ்ச்சியோடு மன்றாடிவருகிறேன். ஏனெனில், தொடக்கமுதல் இன்றுவரை நீங்கள் நற்செய்திப் பணியில் என்னோடு பங்கேற்று வருகிறீர்கள். உங்களுள் இத்தகைய நற்செயலைத் தொடங்கியவர், கிறிஸ்து இயேசுவின் நாள் வரை அதை நிறைவுறச் செய்வார் என உறுதியாய் நம்புகிறேன். நீங்கள் என் இதயத்தில் இடம் பெற்றுவிட்டீர்கள்.

(கொலோ:1: 21-23) - முன்பு நீங்கள் இறைவனோடு உறவற்றவர்களாய் இருந்தீர்கள்; அவரைப் பகைக்கும் உள்ளம் உடையோராய்ச் தீச்செயல்கள் புரிந்து வந்தீர்கள். இப்பொழுது, நீங்கள் தூயோராகவும் மாசற்றோராகவும் குறைச் சொல்லுக்கு ஆளாகாதோராகவும் தம்முன் விளங்குமாறு ஊனுடல் எடுத்த தம் மகனது சாவின் வழியாகக் கடவுள் உங்களைத் தம்மோடு ஒப்புரவாக்கினார். நீங்கள் நற்செய்தியைக் கேட்டுப் பெற்றுக்கொண்ட எதிர்நோக்கை இழந்துவிடாமல் நம்பிக்கையை அடித்தளமாகக் கொண்டு அதில் உறுதியாக நிலைத்திருங்கள். உலகெங்கும் படைப்பனைத்துக்கும் நற்செய்தி பறைசாற்றப்பட்டுள்ளது.

(உரோ:8:18-19) - இக்காலத்தில் நாம் படும் துன்பங்கள் எதிர்காலத்தில் நமக்காக வெளிப்படப் போகிற மாட்சியோடு ஒப்பிடத் தகுதியற்றவை என நான் எண்ணுகிறேன். இம்மாட்சியுடன் கடவுளின் மக்கள் வெளிப்படுவதைக் காண்பதற்காகப் படைப்பே பேராவலோடு காத்திருக்கிறது.

(1:திமோ: 1: 12-14) - எனக்கு வலுவூட்டும் நம் ஆண்டவராகிய இயேசு கிறிஸ்துவுக்கு நன்றி செலுத்துகின்றேன். ஏனெனில் நான் நம்பிக்கைக்குரியவன் என்று கருதி அவர் என்னைத் தம் திருத்தொண்டில் அமர்த்தினார். முன்னர் நான் அவரை பழித்துரைத்தேன்; துன்புறுத்தினேன்; இழிவுபடுத்தினேன். ஆயினும் நம்பிக்கை கொண்டிராத நிலையில் நான் அவ்வாறு நடந்ததால், அவர் எனக்கு இரங்கினார். இயேசு கிறிஸ்துவோடு இணைந்த நிலையில் ஏற்படும் நம்பிக்கையோடும் அன்போடும் நம் ஆண்டவரின் அருள் அளவின்றிப் பெருகியது.

(திபா: 103:1-4) - என் உயிரே! ஆண்டவரைப் போற்றிடு! என் முழு உளமே! அவரது திருப்பெயரை ஏத்திடு! என் உயிரே! ஆண்டவரைப் போற்றிடு! அவருடைய கனிவான செயல்கள் அனைத்தையும் மறவாதே! அவர் உன் குற்றங்களையெல்லாம் மன்னிக்கின்றார்; உன் நோய்களையெல்லாம் குணமாக்குகின்றார். அவர் உன் உயிரைப் படுகுழியினின்று மீட்கின்றார்;

பாடல்

நீ செய்த நன்மை நினைக்கின்றேன் - என்

நெஞ்சுருக நன்றி சொல்கின்றேன் இறைவா - 4 (2)

1. உண்டிட உணவும் உடையுமே கொடுத்து

ஒரு குறையின்றிக் காத்து வந்தாய் (2) - ஓர்

அன்னையைப் போலவே அன்பினைப் பொழிந்து

அல்லல்கள் யாவையும் தீர்த்து வைத்தாய் - 2

2. மலருக்குப் பதிலாய் களையெங்கும் தோன்றி

மனதினை நிரப்புதல் பார்த்திருந்தாய் (2)- உடன்

உலரட்டும் என்றே ஒதுக்கிவிடாமல்

களைகளை அகற்றிக் காத்திருந்தாய் - 2

திருத்தந்தை பதின்னான்காம் லியோன் அவர்களின் சுற்றுமடலில் இருந்து. 'நான் உன்னை அன்பு செய்தேன்' எனும் தலைப்பில் எமது வறுமை, எமது ஏழ்மைத்தன்மை பற்றிய தெளிவு எமக்கு இருக்கவேண்டும் என்றும், மேலும் எம்மைச் சுற்றிக் காணப்படும் ஏழைகளைப் பற்றிய எமது கடமைகளையும் தெளிவாக எடுத்தியம்பிய திருத்தந்தை எமக்கு தரும் அழகிய வார்த்தைகள் இவை...

ஏழைகளைப் பராமரிப்பதை நம்பிக்கையின் நேர்மையின் உறுதியான சான்றாகக் அருளின் மருத்துவர் கண்டார். கடவுளை அன்புசெய்கிறேன் என்றும், ஏழைகளுக்கு இரக்கம் காட்டவில்லை என்றும் கூறும் எவரும் பொய் சொல்கிறார்கள் (காண். 1 யோவான் 4:20). பணக்கார இளைஞனை இயேசு சந்தித்ததையும், ஏழைகளுக்கு தங்கள் உடைமைகளைக் கொடுப்பவர்களுக்கு ஒதுக்கப்பட்ட 'விண்ணக செல்வத்தை' (காண். மத்தேயு 19:21) பற்றி கருத்து தெரிவிக்கையில், ஒகஸ்டின் கடவுளின் நாவில் பின்வரும் வார்த்தைகளை வைக்கிறார்: 'நான் பூமியைப் பெற்றேன், இதனால் நான் சொர்க்கத்தைக் கொடுப்பேன்; நான் தற்காலிக நன்மைகளைப் பெற்றேன், இதனால் நான் நிரந்தர நன்மைகளைத் திருப்பித் தருவேன்; நான் அப்பத்தைப் பெற்றேன், இதனால் நான் உயிரைக் கொடுப்பேன்... எனக்கு விருந்தோம்பல் கொடுக்கப்பட்டது, ஆனால் நான் ஒரு வீட்டைக் கொடுப்பேன்; நான் நோய்வாய்ப்பட்டிருந்தபோது என்னைச் சந்தித்தீர்கள், ஆனால் நான் ஆரோக்கியத்தைக் கொடுப்பேன்; நான் சிறையில் இருந்தபோது என்னைச் சந்தித்தீர்கள், ஆனால் நான் சுதந்திரத்தைக் கொடுப்பேன். நீங்கள் என் ஏழைகளுக்குக் கொடுத்த அப்பம் உண்ணப்பட்டது, ஆனால் நான் கொடுக்கும் அப்பம் உங்களுக்கு புத்துணர்ச்சி அளிப்பது மட்டுமல்லாமல், அது ஒருபோதும் தீர்ந்து போகாது.' மிகவும் தேவையில் இருப்போருக்காக பணி செய்பவர்களுக்கு தாராள மனப்பான்மையில் எல்லாம் வல்லவரை மிஞ்ச முடியாதே. ஏழைகள் மீது அன்பு அதிகமாக இருந்தால், கடவுளிடமிருந்து வரும் வெகுமதி அதிகமாகும்.

சிந்திப்போம். (இல: 45)

இறை மன்னிப்பை ஏங்கி நிற்போம்.